امراض العصر
في مجال مستحضرات العناية هناك امراض ناتجة عن عادات سيئة تم اتباعها مع بعض سنري أمراض متعدده لا علاج لها ونسعي لها وبقوة ونبذل فيها الغالي والنفيس والامراض الخاصة بشعر وبشرة حضرتك جاية ما تخافيش بس خلينا نبدأ بامراض لذيذه ودمها خفيف ومصاريفها الايام دي كتير.
أمراض ليس لها علاج عند الاطباء
هناك العديد من الأمراض التي ليس لها علاج عند الاطباء وعلي الرغم من هذا نذهب إليهم كل يوم ونبذل عندهم الغالي لمحاولة الوصول لعلاج لهذه المشاكل سنسرد لكم مجموعة من الأمراض التي علاجها يكون باتباع العادات الحسنة والتجارب والتنقل ما بين علاج وعلاج.
التخسيس :
أول مرض عندنا هو التخسيس فلربما تصفحت الانترنت ووجدت أن الفلفل والكمون والزنجبيل والقرفة والليمون بل وكل أنواع التوابل تساعد علي التخسيس وكل واحد علي موقع يكتب ما يريد وحضرتك كالمحترمه تأخذي الوصفة وتنزلي شرب كركديه ساخن علي بارد علي قرفة علي ليمون علي كمون من اجل علاج للتخسيس واكسب يا عطار وفي الآخر تمرضى علشان ما تمعنتيش فى قراءة الموضوع من موقع محترم يعرض الحقيقة كاملة ويقول لحضرتك أن التجارب كانت علي الفئران الفار شرب 2 كيلو كمون كان وزنه نصف كيلو واصبح وزنه 450 جرام ههه ، اعلان ابلكس لو راجل كُل طيب لو بنت او سيدة تريد ابلكس للتخسيس وشافتك بتقول لو راجل كُل هتقولك ما انا بنت او ست وهاكل ، نترك المواقع والاعلانات ونذهب إلي صفحة الدكتورة أو الدكتور سين الخطير علي الفيس بوك الذي ابهر المجتمع بنتائج جلساته صاحب الاعلان الجيد والكلمات البراقة علي يافطة العيادة " خس 2 كيلو جرام في الجلسة الواحدة " " خس من 2 إلي 8 سم في الجلسة علشان دي جلسات موجهة لدهون في منطقة معينة زى الخصر والارداف والوجه يعني خسس اى مكان وانت مرتاح والدهون هتنزل مع العرق والبول " تجري انتي وبنتك السمينة التي تريد الزواج وبنت عمتها النحيفة التي تريد أن تسمن دا بدل ما تقولي لبنتك قومى يا حبيبتي نظفى سريرك وخفى نفسك والعبى رياضه وبطلي اكل شوية وسيبك من الشيكولاته المهم نرجع لدكتور التخسيس صاحب العيادة الفخمة الحاصل علي دبلومة التغذية التابعة للتدبير المنزلي وهو خريج صيدلة أو خريج علاج طبيعى تركوا جميعا مجالهم الذي لا يوجد به دنانير وذهبوا جميعًا إلي التخصص الذى لا يحتاج اكثر من شخص يحمل لقب دكتور ويكون سليط اللسان كل ما تروح له يوبخك لو انت راجل ولو بنت كل ماتخسي ربع لا تمن كيلو يقولك الله نتائج مبهرة انتي لذيذة وكتكوتة وان شاء الله بعد 10 سنين هنكون خسينا 2 كيلو ونصف لا انتي هتكوني اجمل والنتائج هتكون كويسة ومبهرة لو اخدتي معانا كورس التنحيف تحت اجهزة الفاكيوم و جهاز الكافيتيشن للسيلوليت وجهاز مش عارفه ايه لعمل ايه وتاخدى معاهم علاج او وصفة عشبية اسمها ديناميت الديناميت مكون من الاعشاب الطبيعية 100% تساعد علي التخلص من الدهون التى تم اذابتها في جلسات الكافيتيشن حضرتك والباقى عليك اشربى ماء كتير ولفي الفويل دا وورق التغليف الطبى مع كريم باندر التخسيس الذي ليس له وجود الا فى دولاب الدكتورة اخلاص التى تعمل باخلاص الوصفة العشبيه دي خلاصة 10 سنين في كلية طب تل ابيب التخصصى وممكن تاخدي كورس واحد بس لاذابة الدهون وبلاش شد الجلد نخليه في الآخر لو ما فيش فلوس تكفي وعندنا عروض 16 جلسه عليهم جلستين هدية وادفعي يا احلام لما الدهون تنام لا وايه الدكتور يكون ممشيكي على رجيم قاسي وانتي مسكينة او محدودة الذكاء لما تخسى تقولى بسبب الجلسات والاجهزة ولما تزيدي الدكتورة او الدكتور يقولك دا بسبب البرتقاله اللى انتي اكلتيها السنة اللى فاتت وبوظت الرجيم انتى لازم تمشى على الكورس بالظبط لا شك ان اجهزة الفاكيوم وغيرها مريحة من ناحية المساج وكلنا لازم نمارس الرياضه و نعمل جلسات المساج للشعور بالراحة حتي لو نحيفين ولا علاقة للطب بالتخسيس ولا العلاج الطبيعي ولا وجع الدماغ دا كله.
فلوسك فين يا هانم
فلوسك فين يا مدمنة حضرتك بتدفعي تمن دواء ليس بدواء للتخسيس وبتدفعى تمن رحلة للدكتورة التي ليست بطبيبة لمدة اسبوعين مكافأه من مصنعي الدواء علشان تقضى احسن اسبوعين في سنغافورة وحضرتك قاعده علي ممر كوبرى ارض اللواء بتتسولي.
ولما نقول التخسيس بتظبيط الاكل وممارسة الرياضة واتباع عادات غذائية صحية تقولي لا ما انا بعمل كل دا وما فيش فايده هقولك سعد زغلول قال ما فيش فايدة ولكن ما فيش فايده في حضرتك وتفكير حضرتك لو بتضحكي هيكون علي نفسك وما فيش وصفة سحرية كلها عادات حسنة صحية تتبعيها وتكوني افضل.
دا كان اول مرض معانا فى سلسلة العلاج بالفرفشة نراكم في مرض تاني من امراض العقل او العصر المستعصية والمكلفة والقادرة علي خراب البيت اكتر من المخدرات لو عجبك المقال ممكن تشيريه ولو هيفيدك ممكن تعليق لطيف علشان تخسى لما تبذلي مجهود وتخرجي طاقة.
فليكن تعليقك راقي مثلك