نار جهنم
ممكن تقول لنفسك:
الله اعلم هعيش كم سنة ؟ ، ويا تري هعيش كم سنة في القبر ؟ ، ولسه يوم القيامة 50 الف سنة مما تعدون !
طب ليه بعكنن علي نفسي لسه بدرى علي الموت وإذا مت لسه هعيش سنين في القبر ، وإذا انتهت حياة القبر فمازال هناك يوم البعث واللي هيستمر 50 الف سنة دي حياة طويلة يااااااااااه يا عم ربنا غفور رحيم بلاش عكننه.
الحكاية بتبدأ من عند الله اعلم انا هعيش كم سنة ؟ يعني لو أنت ذكي إلي أبسط حد واقرب حد فهتعرف إن الموت قريب جدا " ونحن اقرب إليه من حبل الوريد " يعني ربنا قادر يقبض روحك وبأسهل ما يكون وفي أى وقت ، طب خلاص كدا ؟
نهايتك قريبه وممكن تكون في أي وقت ممكن تكون في الوقت اللي انت بتقرأ فيه الكلام دا ، هتقولي ما انبهرتش ما انا عارف بس ربنا غفور رحيم .
الصدمة
الصدمة الأكبر لما تعرف إن النار أقرب إليك من حكاية الموت نفسه لأنك لما بتموت لاما إلي الجنة أو إلي النار ، قال رسول الله صلى الله عليه وسلم " من مات فقد قامت قيامته ، وانما تموتون كما تنامون ، وتُبعثون كما تستيقظون " يعني ايه الكلام دا ؟ يعني لو حضرتك مت فجأه وانت من أهل النار هتكون علي طول في النار مش بكره الصبح دا الموضوع هيبدأ من ساعة خروج الروح وصعودها إلي السماء والملائكة منتظراها فإن كانت الروح مؤمنة تُفتح لها أبواب السماء وإن كانت غير مؤمنة تُغلق في وجهها ابواب السماء وضتربها الملائكة ضربة تردها إلي سابع ارض في النهاية الموت قريب والنار او الجنة اقرب من الموت نفسه يعني بمجرد خروج روحك تبدأ قيامتك ودخلت في الحياة التانية اللي هي لو نار فهتكون فعلاً اشد وافظع من اللي بتشوفه في الدنيا والافلام والمسلسلات النار مش مجرد لهب احمر وفوهات بركان مفتوحه من اللي بتشوفها علي ناشينوال جيوغرافك وصف النار الحقيقي نار جهنم سوداء اللي بيدخلها ما بيشوفش حاجه تخيل الرعب واحد بينضرب ومش عارف الضرب جاي منين بيتحرق من كل حته وهو متسلسل ومش عارف حتي يحط ايده علي وشه علشان يحاول حتي يمنع النار عن وشه .
اهل النار بيدخلوها مربوطين في سلاسل السلاسل دي بتدخل من مناخير وتخرج من ادبارهم والسلاسل دي من نحاس منصهر وملفوفه حوالين جسمهم وبيتسحبوا بالسلاسل دي بتجرجرهم علي وشهم يعني مش حتي ماشيين علي رجليهم مش في سجن امريكي هما دي نار جهنم اللي اعدها ربنا للكافرين جهنم لها 70 الف زمان ولكل زمام 70 الف ملك واللي يقع فيها يفضل 70 سنة ولا يصل إلي قعرها .
اهل النار وهما داخلين النار ومربوطين مع بعض في سلاسل بيلعنوا بعض والواحد فيهم يقول يارب هذا فلان ضاعف له العذاب لأنه هو اللي ضيعني معاه وسبب دخولي النار ، وربنا يرد عليه بأنه يضاعف لهما العذاب الاتنين يتضاعف لهم العذاب ويكسروا او يتكوروا بمعني ادق لحد ما تتربط روؤسهم بأقدامهم ويُلقي بهم في النار وجلدهم يتشوي ويتساقط من علي اجسامهم فربنا يبدلهم جلود تانية علشان يتكرر العذاب دائرة مغلقة ومش هتتكسر وربنا وعد بكدا نارا ابدا للكافرين .
تفتكر وهما في العذاب دا كله نفسهم ياكلوا او يشربوا ؟
طبعاً نفسهم ياكلوا فيأكلوا الشوك يقطع بطنهم من جوا ، ونفسهم يشربوا فيشربوا ماء مغلي يغلي وجوههم من قبل ما يشربوا منه فيبحثوا عن بديل ويضطروا يشربوا الصديد اللي نازل من شوي اجسادهم بالنار والزقوم اكلهم دي شجرة نتنه تنبت في جهنم كلها نتنه كأنها روؤس الشياطين وطبعًا علشان احنا ما نعرفش الشياطين شكلهم ايه فتقدر تشوف اقذر واعفن وجه في فيلم اجنبي حتي لو كان احدب نوتردام دا ممكن يكون صورته احسن من احسن رأس شيطان ممكن تتخيلها وتيجي في دماغك وهو بياكل وبيشرب يُقال له ذق انك انت العزيز الكريم .
مش انت اللي افتريت علي الناس وكلت حقهم وسجنتهم واولادهم ذق انك انت العزيز الكريم ، مش انت اللي قتلت وشردت واغتبت وشتمت وذليت الناس وقولت انا ربكم الاعلي ذق انك انت العزيز الكريم ، مش انت اللي ..... ذق انك انت العزيز الكريم .
وانت في وسط دا كله بتنادي علي اهل الجنة وتطلب منهم ماء او اي حاجه والرد لا ما فيش ربنا حرمها علي الكافرين " وَنَادَى أَصْحَابُ النَّارِ أَصْحَابَ الْجَنَّةِ أَنْ أَفِيضُوا عَلَيْنَا مِنَ الْمَاءِ أَوْ مِمَّا رَزَقَكُمُ اللَّهُ قَالُوا إِنَّ اللَّهَ حَرَّمَهُمَا عَلَى الْكَافِرِينَ " ، طيب ينادوا علي خزنة جهنم ويطلبوا منهم ان ربنا يخفف عنهم يوم من العذاب يوم واحد بس نفسهم في يوم واحد راحة بس ما فيش راحة عذاب مستمر " وَقَالَ الَّذِينَ فِي النَّارِ لِخَزَنَةِ جَهَنَّمَ ادْعُوا رَبَّكُمْ يُخَفِّفْ عَنَّا يَوْمًا مِّنَ الْعَذَابِ قَالُوا أَوَلَمْ تَكُ تَأْتِيكُمْ رُسُلُكُم بِالْبَيِّنَاتِ ۖ قَالُوا بَلَىٰ ۚ قَالُوا فَادْعُوا ۗ وَمَا دُعَاءُ الْكَافِرِينَ إِلَّا فِي ضَلَالٍ " تمنوا وادعو زي ما انتم عايزين دعائكم بلح ولا له ستين لزمه ، طيب ننتهي نكون ما فيش نموت وننتهي " وَنَادَوْا يَا مَالِكُ لِيَقْضِ عَلَيْنَا رَبُّكَ ۖ قَالَ إِنَّكُم مَّاكِثُونَ " بس ما فيش فايدة امكثوا فيها ما فيش موت خلاص عذاب بس .
انت عايش في الدنيا يوم عذاب وايام راحه او يوم راحه وايام عذاب انما في الاخره كله لاما عذاب في نار جهنم او نعيم في الجنة .
اتصدمت ؟ لو اتصدمت فالحق نفسك قبل ما تتفحم يا برنس واتقي النار .
الحق اعمل في ايام العتق من النار لعلك تكون من الناجين منها نجاني الله واياكم من النار وعذابهم ومن عذاب القبر .
لو عجبكم الموضوع لا تنسونا من صالح دعائكم .
فليكن تعليقك راقي مثلك